28/10/2010
خاڵە کورتە باڵاکەم شوان عوسمان خاڵە کورتە باڵاکەم خەونەکانت زۆر لە خۆت گەورەتر بوون، هەر لە منداڵیەوە بە گەورەکردنی ئەو خەونانە گەورە ئەبوویت وخۆشت بە گەورە ئەزانی، کەچی گەورە بوونی تۆ هەر خۆی لە خۆی خەونێک بوو ودوایی نەئەهات، چونکە بە لای ئەوانەوە ئەتوو هەر لە جێی خۆتی ونەگۆڕاوی، بەڵکو بە مەزەندەی ئەوانەوە لە گچکە بوونیشدا ماویتەوە، باشم ئەزانی ئەتوو باکت بەو مەزەندانە نەبوو، باشیش ئەتزانی لە ناو ئەو کۆمەڵگایە رەق وتەقەی رۆژهەڵاتیدا کە حیساب بۆ مرۆڤی ئاسایی ناکرێت، چۆن مرۆیەکی نائاسایی وەکو تۆ، ئەچێتە ناو پرس وپرسیارو حیساباتەکانیان، شتە مرۆیی وتایبەتمەندیە گرانبەهاکانی کەسێتیی لەمێژە هەرزانفرۆش کراون، لە ناو خەرواری زاکیرەو هەمبانەی کەلتووری یەکەیەکەیان، تەنیا حیساب بۆ شتی گەورەو زل وبەرچاو ئەکرێت، ئەگەر شتێک گەورە ودیار نەبوو، ئەوا هەر بە گچکەیی ناوی دەر ئەکەن وئەیناسن واش بە دەوروبەریان ئەناسێنن.... بەڵام ئەتوو هەرگیز خۆت بە گچکە نەئەزانی وئەگەر ئەوانیش دانیان بە گەورەییت نەنابایە، ئەوا بە خەون گەورەیی خۆت لەگەل خۆت ئەسەلمان، بۆیە بە لای تۆوە خەون شتێکی (موقەدەس) بوو، مرۆی بێ خەون مەلێکی بێ باڵەو ناتوانێت یەک بست بفڕێت، ژیان ئەگەر خاڵی بێت لە خەون شتێکی بێ مانایەو مەحالە، جا لەبەر ئەوە هەرگیز نەتئەویست دەست بەرداری خەون بیت، دیارە خەونی ئێوەش لە خەونی ئێمە نەئەچوو، خەونەکانیشتان لە ئاست باڵاو واقیعە نەهامەتیەکانتان بوو، بەڵام خەونە گچکەییەکانتان لە خەونە گەورەکانی ئێمە رەنگینتر و خامۆشتر و ئاسوودەتر بوو ..... لەگەل ئەو هەموو گێرمەو کێشەی رۆژانەتدا، لە هەولی شتیێکی ئەوها مەحال ودژوارتدا نەبووی، بە تەنیا ئەتەویست هاوشانی خەونەکانت، وەکو کەسێکی ئاسایی ئارام وئاسودە بژیت، بەڵام خۆ زۆر جاریش خەون دادی نەئەدای ونەتئەتوانی ژیانێکی ئاسایی بۆ خۆت دەستەبەر بکەی وەکو گەمەی (پەیژەو مار) لە تۆقەرانی درەختی ئارەزوو وخەونەکانت، پێت هەڵئەزناو تا دامێن شۆڕ ئەبوویەوەو خۆت پێ نەگیرایەوە، ئاخر ژیانی تۆ ژیانێکی ئەوها بوو، ئاسایی نەبوو، شەڕێکی بەردەوام بوو، شەڕێکی چارەنووسی دەستەو یەخەی سەخت بوو لە پێناو مانەوەی خۆت وخەونەکانت ئەبووا سەرسەخت تریش بیت، بەڵام شەڕی واش گرەنتی تا سەری نیە ودۆڕانی مسۆگەرە شەر لەگەل چارەنووسێکی سروشتی وزگماک، تا سەر ئاستەمە سەر بگرێت.... کێشەی تۆ کێشەی نەبوونی ودەست کورتی نەبوو کە پەلە نەکەی وئارام بیت وچاوەڕێی دەرفەتێکی دیکە بکەی، لە رۆژگارێکی تر هەلێکت دەست بکەوێت، جا لەبەر ئەوە رەهەند ومەودای خەونەکانت ئاسایی نەبێت، گرفتی سەرەکی تۆ باڵات بوو، بەژنی تۆ مایەی سەرئێشەت بوو وگێچەلی لۆ ئەنایەوە، تۆ لەگەل بوونی ئەو خەونە ئاساییانەت بەژنێکی ئاساییت نەبوو، وەکو بەژنی ئەو خەڵکە ئاساییەی، لەگەلت ئەژیان ولەگەل بالایان گەورە ئەبوون وباشتر دەرئەکەوتن، تۆ بە درێژایی (٤٢) ساڵەی تەمەنت هەر لە جێگەی خۆت چەقت بەستووە هەر بە هەمان قەوارەی تەمەنی (٦) ساڵانیت، چەند سانتیمێکت زیاد نەکردووەو تۆزقالیکش قەبارەت گەورە نەبووە..... گەلێک جار کە هەولت ئەدا وەکو خەڵکێکی ئاسایی بە کۆڵانی گەڕەکەکەتان، پیاسەیەکی ئێواران بۆ فێنک کردنەوەی رۆحت بکەی وتاوێکیش لە ناو واقیعی جوان وسادەی خۆت مەلەوانی بە ناو خەونە رەنگاو رەنگەکانت بکەی، بەڵام لە پڕ هەموو چرپەو هەناسەیەکی خۆشیان لێ سەرەمەرگ ئەکردی، بۆ نەگبەتی تۆ منداڵێکی هارو چەتوون، لە لاپەڕگەیەکەوە وەکو مووی کەپوو لە بەردەمت شین ئەبوو، رستە ژەنگیانە کەسک وسۆرەکانی دەستبێحی خەیاڵت، یەک بە یەک لەیەکتر ئەترازان و تامی تەڕی ئەو پیاسەشتان وەکو زەقنەبووتێک بە قوڕگە دەرخوارد ئەدرا ... منداڵەکە کەتنەکەی ئەکردو خۆی دەرباز ئەکرد،ئەو جارەشت هاتەوە بیر کە بەیەکەوە هەردووکتان وەکو رەقەم ( ١٠) لە کۆلانەکەی (تەیراوە) بە دەم قسەو پێکەنین تێئەپەڕین، لە ناکاو مندالێکی بیژمۆت، وەکو ئەوەی لە کونە کەپووی شەیتان هاتبێتە دەر، لە پەنای دیواری حەسارەکە بە دەنگێکی گڕو زبر بانگی ئەکرد : شەموولە... شەموولە...هۆیها .... شەموولە........ تۆش نەتئەزانی چ هەڵوێستێکی بەرامبەر خاڵە باڵا نائاسییەکەی تەنیشتت بنوێنی، هەندێک جار خۆت لێ گێل ئەکرد وەکو ئەوەی گوێت لە هیچ نە بوو بێت، لە راستیشدا زۆر شەرمت لە خۆت ئەکردەوە، لە شەرمان ئەگەر درزێکت هەست پێ کردبایە، ئەوا خۆت ئەکرد بە ناویداو لە شەرمەزاریە خۆتت لە ناو ئەشاردەوە، چەند جارێک بە دەست وچاو منداڵەکەت ئاگادار کردەوە، تا وازتان لێ بێنێت وخاڵەکەت چیتر هەراسان نەکات، بەڵام بێ سوود بوو، خاڵەکورتە باڵاکەشت وەکو ئەوەی لێرە نەبیت و"نە بای دی بێت ونە باران" هەر خۆی بەو مەسەلەیە شێلو نەئەکردو لە رۆیشتن وقسە کردنیش بەردەوام بوو، ئا لەو کاتانە هەستم ئەکرد، ئەو لە ئێمە ناچێت، ئەگەرچی ئەو لە باڵا وەکو ئێمە نیە، بەڵام لە هەست ونەستی ناوەوەش شتێکی ترەو لە ئێمە نەئەچوو، وەکو ئەوەی لە ئەستێرەیەکی دیکەوە هاتبێت، وەکو ئێمەش حەزی لە رق هەڵگرتن وتۆڵە سەندنەوە نەبوو... لە هەر کاردانەوەیەکی خراپی کەسانی دیکە، قەت خۆی تێک نەئەداو یان وەکو پەلاپیتکەی تفەنگ بە دەم رووداوەکە نەئەتەقیەوە، لە سەر قسەیەکی هیچ دۆو دۆشاوێکی بێ مانای تێکەڵاو نەئەکرد، لە سەر ئەو هێمنی ونەرم ونیانی وسادەییە پاکەی زۆر جار ئێرەییم پێوە ئەبردو لە بەرابمەریدا (حەسود) ئەبووم و خۆزگەم ئەخواست ئەگەر ئێمەش ئەوها بەژنمان کورت بووایە، بەڵام باشتر نەبوو، عەقڵمان ئەوها کورت نەبووایەو هەست وسۆزێکی وا سفت ورەق ودڕەندەمان نە بووایە، لە قاڵبی کەسێتی یەکی راستەقینەی مرۆڤانە ژیانمان بەڕێ کردبایە، باڵایەکی بەرزو بەژنێکی شۆخ بە کەلک چی دێن، ئەگەر لەگەلیدا زمانێکی زبرو دەروونێکی پڕ لە کینەو هۆشێکی شەڕانگێز وهەستێکی رەقی نامرۆڤانە کۆنترۆلی کەسێتی ورەفتارمان بکات..... خاڵە گەورەکەی من، ئەگەرچی تۆ لەبەردەم روانینی ئەو خەڵکە قەزەمێکی کورتەباڵای،بەڵام تۆ لە لای من زۆر گەورە بووی، لە نزیکەوەش باشم ئەناسی وئەمزانی وەکو ئەو خەونانەت پاکی وبێگەردو گەورەیت،گەورەیی تۆ لە سادەوساکاری وسروشتی کەسێتیت بوو، خۆشت بە مرۆڤ وخەڵکیشت بە مرۆڤ ئەزانی، بۆیە هەرگیز جلەوی ئارامی خۆت لە دەست نەئەدا، رێگاشت نەئەدا ئەو چاوانەی بە سۆمایەکی بەزەییدارانە لێت ئەروانن، وا بڕوانن، بەڵکو هەولت ئەدا خۆت بە سەقەت نەزانی، لە بەردەم نیگا شڕو سەقەتەکەی کۆمەڵەکەمان، وەکو ساغێک هەلسوکەوت بکەی ، ئەگەرچی تۆ لە قاڵبێکی نەگۆڕدا بوویت ودەوروبەریشت لە قاڵبێکی گۆڕاو وباڵا دەرکردن، بەڵام بێ ئەوەی کەسێک درک بە خەون وخەیاڵە گەورە باڵاو شاراوەکانت بکات.... گەلێک جار (دارا)ی زاوات هەر بە گالتەوە ئەیگوت ؛ " دلۆ ئیشی نیە، هەر ئەبێ (جیل) لەدوو (جیل) بەرێ بکات......" خۆ راستیشی ئەکرد، نەوەکان چەند نادڵسۆزو بێ ئەمەک بوون، هاودەمت بوون تا ئەو دەمەی بالانسی باڵایان لە هاوسەنگی دا بوو، ئەو چرکەساتەی لەشولاریان جەند مللیمێک هەڵدەجوو، یەکاویەک پایدۆزیان دەکردو ئۆگریان دەکرد، چەند کەسێک دەناسم، هەر هەموویان لە رۆژگارێک هاوەل وبرادەری یاری وگەمەی منداڵی ئەو بوون، کەچی ئەوان کە باڵایان گەورەترو بەرزتر ئەبوو شەرمیان دەکرد، چیتر لەگەلت بمێننەوەو بەجێ یان دەهێشتی، تۆش بەوە راهات بوویت وخۆت تێک نەئەدا چاوەرێی منداڵێکی دیکەت لە زەمەنێکی دیکە دەکرد بێتە ریزبەندی و ولەگەلیدا دەست بە ژیانی پەیوەندیەکی تازەو جەولەیەکی دیکەی برادەرێتی بکەیەوە.... شەری چارەنووسی تۆ لەگەل قەدەر، شەڕێکی بەردەوامی ژیانت بوو دوایی نەئەهات، لەبەرئەوەی ئیرادەت هەبوو ئەوها زوو سارد نەئەبوویەوەو سلت نەئەکردەوەو بە جورئەتەوە خۆت لە قەرەی مڵملانێی سەرنج وقسە رەقەکانی بەژن ئاساییەکان ئەدا، هەمیشە لەبەردەم ئەو پرجک وتەگەرەو دارەبەستە ناسروشتانەی دەهاتنە سەر رێگای هەنگاوەکانت، ورەت بەر نەئەداو ژیانت لە خۆت تێک نەدەدا، تەنانەت مەکتەب وخوێندنیشت تەواو کرد، هەرچەندە ئاسان نەبوو دانیشتن لە یەک پۆڵ ولە سەر یەک تەختە کە هەموویان ئاسایی لە جەستەو باڵا بوون ، تەنیا ئەتوو شتێکی دیکە بوویت.... ( بازۆ)ش هەمیشە وازی لەگاڵتە بێ سەرو بەرەکانی نەدەهێناو ئەیگوت ؛ " ئەزانی دلۆ..لە پێش چاومە ئەو رۆژەی ئەتوو مەکتەب تەواو ئەکەی.... ئەبیتە (موظف) ...لۆ ئەوەی (مراجعە)ەکان لە توو قیافایان بلندتر نەبن ...قۆرتێک لە پێش مێزەکەی خۆت لێ ئەدەی.... لۆ ئەوەی کەسەک خۆی بە گەورەتر لە توو نەزانی " ئەتوو نە بە گالتەی ئەوان ونە بە راستی ئەو کەسانەی دەوروبەرت تەنگەتاوو مشەوەش نەئەبووی، ورەت بەر نەئەداو ئیرادەت توندتر ئەبوو، تاکە کەسێک ئەوەی لە مەینەتیەکانی تۆ تێدەگەیشت ولە بەردەم ئەو گالتانە بێ دەنگ نەدەبوو ولێیان دەهاتە دەنگ، دایکت بوو وەکو شێرەژنێک لێیان دەهاتە دەنگ وهاواری ئەکرد بە سەریان : " بە قوربانی بن .....رۆژەک دێ ئەتان بینم لە هەمووتان پیاو تر ئەبیت....ئەبێ یەک یەک پێڵاوی لۆ دانێن....ئەو رۆژە دێ پیشانتان ئەدەم " ئەویش لەوەدا راستی ئەکرد، چونکە ئەو رۆژە هات کە دایکی بیری لێ ئەکردەوە زۆر لەوانەی ئەو بەزمەیان پێ دەکرد، وەکو ئەو ئێستا ژیانێکی خۆش ناژین، ئەگەرچی ئەو لە باڵاو ژیانی رابردووی بە تێرو پری نەژیا، بەلام ئەمرۆکە بە تێری ژیانێکی ئاسایی ئەژیت وهەموو ئەو دەرفەت هەلانەی لە دەستی چوون، هەول دەدا دابینیان بکات، ئەوانەی گاڵتەیان پێ دەکرد، خاوەنی ئەو خانووبەرە نین ولە ناو ئەو ( سیارە)شدا هاتووچۆ ناکەن، بە قات وبۆینباخێکی شیک، لە پلەو پایەکی کاربەدەستی بەرز، ژنێکی خنجیلانی وەکو خۆی وسێ منداڵی جوان، دووانی ئاسایی ویەکیان نائاسایی لە باڵا. ئەوانە هەمووی دەستکەوتێکی بەرزی تۆن، لە سای خۆڕاگرتن وبەرزی هەست ونەستەکانت هاتنە دەست، نەک لە بەرزی باڵاوە...... خاڵەکەم !!!! بووە کەسێکی ئاسایی ناو کۆمەڵ، هەموو شتە لەدەست چووەکانی رابردووی خۆی دابین کردو پیادە کردن، ئێستا کەسێکی کاربەدەست و واقیعی ناو کۆمەلگایەیەو بەرپرسی دەزگایەکی باڵا نائاساییەکانە، بەڵام خاڵەکەم، بە داخەوە !!!! جارێکی دیکە ناتوانێت خەون وەکو جاران ببینێت وهەموو خەونە ناسک هەست و نەست وشتە پاک وجوانەکانی وەران وبوونە قوربانی خەزانی عومری بێ باڵایی، لە بڕی ئەو هەموو ئەو شتە جوان وسادانە بەرپرسێکی ئاسایی باڵا نائاسایی یە وەکو هەموو ئەو بەرپرسە نائاساییانەی بە نائاسایی لە هەڵتۆقین، ئەویش هەڵتۆقی وهەموو شتێکی لەدەست چووی بەدەست هێنا، بەڵام هاوەلێتی منی لەدەست چوو ومنیش خاڵێکم لە دەست چوو.... کوردستان-شەقڵاوە پاییزی ٢٠١٠
خاڵە کورتە باڵاکەم
شوان عوسمان
خاڵە کورتە باڵاکەم
خەونەکانت زۆر لە خۆت گەورەتر بوون، هەر لە منداڵیەوە بە گەورەکردنی ئەو خەونانە گەورە ئەبوویت وخۆشت بە گەورە ئەزانی، کەچی گەورە بوونی تۆ هەر خۆی لە خۆی خەونێک بوو ودوایی نەئەهات، چونکە بە لای ئەوانەوە ئەتوو هەر لە جێی خۆتی ونەگۆڕاوی، بەڵکو بە مەزەندەی ئەوانەوە لە گچکە بوونیشدا ماویتەوە، باشم ئەزانی ئەتوو باکت بەو مەزەندانە نەبوو، باشیش ئەتزانی لە ناو ئەو کۆمەڵگایە رەق وتەقەی رۆژهەڵاتیدا کە حیساب بۆ مرۆڤی ئاسایی ناکرێت، چۆن مرۆیەکی نائاسایی وەکو تۆ، ئەچێتە ناو پرس وپرسیارو حیساباتەکانیان، شتە مرۆیی وتایبەتمەندیە گرانبەهاکانی کەسێتیی لەمێژە هەرزانفرۆش کراون، لە ناو خەرواری زاکیرەو هەمبانەی کەلتووری یەکەیەکەیان، تەنیا حیساب بۆ شتی گەورەو زل وبەرچاو ئەکرێت، ئەگەر شتێک گەورە ودیار نەبوو، ئەوا هەر بە گچکەیی ناوی دەر ئەکەن وئەیناسن واش بە دەوروبەریان ئەناسێنن....
بەڵام ئەتوو هەرگیز خۆت بە گچکە نەئەزانی وئەگەر ئەوانیش دانیان بە گەورەییت نەنابایە، ئەوا بە خەون گەورەیی خۆت لەگەل خۆت ئەسەلمان، بۆیە بە لای تۆوە خەون شتێکی (موقەدەس) بوو، مرۆی بێ خەون مەلێکی بێ باڵەو ناتوانێت یەک بست بفڕێت، ژیان ئەگەر خاڵی بێت لە خەون شتێکی بێ مانایەو مەحالە، جا لەبەر ئەوە هەرگیز نەتئەویست دەست بەرداری خەون بیت، دیارە خەونی ئێوەش لە خەونی ئێمە نەئەچوو، خەونەکانیشتان لە ئاست باڵاو واقیعە نەهامەتیەکانتان بوو، بەڵام خەونە گچکەییەکانتان لە خەونە گەورەکانی ئێمە رەنگینتر و خامۆشتر و ئاسوودەتر بوو .....
لەگەل ئەو هەموو گێرمەو کێشەی رۆژانەتدا، لە هەولی شتیێکی ئەوها مەحال ودژوارتدا نەبووی، بە تەنیا ئەتەویست هاوشانی خەونەکانت، وەکو کەسێکی ئاسایی ئارام وئاسودە بژیت، بەڵام خۆ زۆر جاریش خەون دادی نەئەدای ونەتئەتوانی ژیانێکی ئاسایی بۆ خۆت دەستەبەر بکەی وەکو گەمەی (پەیژەو مار) لە تۆقەرانی درەختی ئارەزوو وخەونەکانت، پێت هەڵئەزناو تا دامێن شۆڕ ئەبوویەوەو خۆت پێ نەگیرایەوە، ئاخر ژیانی تۆ ژیانێکی ئەوها بوو، ئاسایی نەبوو، شەڕێکی بەردەوام بوو، شەڕێکی چارەنووسی دەستەو یەخەی سەخت بوو لە پێناو مانەوەی خۆت وخەونەکانت ئەبووا سەرسەخت تریش بیت، بەڵام شەڕی واش گرەنتی تا سەری نیە ودۆڕانی مسۆگەرە شەر لەگەل چارەنووسێکی سروشتی وزگماک، تا سەر ئاستەمە سەر بگرێت....
کێشەی تۆ کێشەی نەبوونی ودەست کورتی نەبوو کە پەلە نەکەی وئارام بیت وچاوەڕێی دەرفەتێکی دیکە بکەی، لە رۆژگارێکی تر هەلێکت دەست بکەوێت، جا لەبەر ئەوە رەهەند ومەودای خەونەکانت ئاسایی نەبێت، گرفتی سەرەکی تۆ باڵات بوو، بەژنی تۆ مایەی سەرئێشەت بوو وگێچەلی لۆ ئەنایەوە، تۆ لەگەل بوونی ئەو خەونە ئاساییانەت بەژنێکی ئاساییت نەبوو، وەکو بەژنی ئەو خەڵکە ئاساییەی، لەگەلت ئەژیان ولەگەل بالایان گەورە ئەبوون وباشتر دەرئەکەوتن، تۆ بە درێژایی (٤٢) ساڵەی تەمەنت هەر لە جێگەی خۆت چەقت بەستووە هەر بە هەمان قەوارەی تەمەنی (٦) ساڵانیت، چەند سانتیمێکت زیاد نەکردووەو تۆزقالیکش قەبارەت گەورە نەبووە.....
گەلێک جار کە هەولت ئەدا وەکو خەڵکێکی ئاسایی بە کۆڵانی گەڕەکەکەتان، پیاسەیەکی ئێواران بۆ فێنک کردنەوەی رۆحت بکەی وتاوێکیش لە ناو واقیعی جوان وسادەی خۆت مەلەوانی بە ناو خەونە رەنگاو رەنگەکانت بکەی، بەڵام لە پڕ هەموو چرپەو هەناسەیەکی خۆشیان لێ سەرەمەرگ ئەکردی، بۆ نەگبەتی تۆ منداڵێکی هارو چەتوون، لە لاپەڕگەیەکەوە وەکو مووی کەپوو لە بەردەمت شین ئەبوو، رستە ژەنگیانە کەسک وسۆرەکانی دەستبێحی خەیاڵت، یەک بە یەک لەیەکتر ئەترازان و تامی تەڕی ئەو پیاسەشتان وەکو زەقنەبووتێک بە قوڕگە دەرخوارد ئەدرا ...
منداڵەکە کەتنەکەی ئەکردو خۆی دەرباز ئەکرد،ئەو جارەشت هاتەوە بیر کە بەیەکەوە هەردووکتان وەکو رەقەم ( ١٠) لە کۆلانەکەی (تەیراوە) بە دەم قسەو پێکەنین تێئەپەڕین، لە ناکاو مندالێکی بیژمۆت، وەکو ئەوەی لە کونە کەپووی شەیتان هاتبێتە دەر، لە پەنای دیواری حەسارەکە بە دەنگێکی گڕو زبر بانگی ئەکرد :
شەموولە... شەموولە...هۆیها .... شەموولە........
تۆش نەتئەزانی چ هەڵوێستێکی بەرامبەر خاڵە باڵا نائاسییەکەی تەنیشتت بنوێنی، هەندێک جار خۆت لێ گێل ئەکرد وەکو ئەوەی گوێت لە هیچ نە بوو بێت، لە راستیشدا زۆر شەرمت لە خۆت ئەکردەوە، لە شەرمان ئەگەر درزێکت هەست پێ کردبایە، ئەوا خۆت ئەکرد بە ناویداو لە شەرمەزاریە خۆتت لە ناو ئەشاردەوە، چەند جارێک بە دەست وچاو منداڵەکەت ئاگادار کردەوە، تا وازتان لێ بێنێت وخاڵەکەت چیتر هەراسان نەکات، بەڵام بێ سوود بوو، خاڵەکورتە باڵاکەشت وەکو ئەوەی لێرە نەبیت و"نە بای دی بێت ونە باران" هەر خۆی بەو مەسەلەیە شێلو نەئەکردو لە رۆیشتن وقسە کردنیش بەردەوام بوو، ئا لەو کاتانە هەستم ئەکرد، ئەو لە ئێمە ناچێت، ئەگەرچی ئەو لە باڵا وەکو ئێمە نیە، بەڵام لە هەست ونەستی ناوەوەش شتێکی ترەو لە ئێمە نەئەچوو، وەکو ئەوەی لە ئەستێرەیەکی دیکەوە هاتبێت، وەکو ئێمەش حەزی لە رق هەڵگرتن وتۆڵە سەندنەوە نەبوو...
لە هەر کاردانەوەیەکی خراپی کەسانی دیکە، قەت خۆی تێک نەئەداو یان وەکو پەلاپیتکەی تفەنگ بە دەم رووداوەکە نەئەتەقیەوە، لە سەر قسەیەکی هیچ دۆو دۆشاوێکی بێ مانای تێکەڵاو نەئەکرد، لە سەر ئەو هێمنی ونەرم ونیانی وسادەییە پاکەی زۆر جار ئێرەییم پێوە ئەبردو لە بەرابمەریدا (حەسود) ئەبووم و خۆزگەم ئەخواست ئەگەر ئێمەش ئەوها بەژنمان کورت بووایە، بەڵام باشتر نەبوو، عەقڵمان ئەوها کورت نەبووایەو هەست وسۆزێکی وا سفت ورەق ودڕەندەمان نە بووایە، لە قاڵبی کەسێتی یەکی راستەقینەی مرۆڤانە ژیانمان بەڕێ کردبایە، باڵایەکی بەرزو بەژنێکی شۆخ بە کەلک چی دێن، ئەگەر لەگەلیدا زمانێکی زبرو دەروونێکی پڕ لە کینەو هۆشێکی شەڕانگێز وهەستێکی رەقی نامرۆڤانە کۆنترۆلی کەسێتی ورەفتارمان بکات.....
خاڵە گەورەکەی من، ئەگەرچی تۆ لەبەردەم روانینی ئەو خەڵکە قەزەمێکی کورتەباڵای،بەڵام تۆ لە لای من زۆر گەورە بووی، لە نزیکەوەش باشم ئەناسی وئەمزانی وەکو ئەو خەونانەت پاکی وبێگەردو گەورەیت،گەورەیی تۆ لە سادەوساکاری وسروشتی کەسێتیت بوو، خۆشت بە مرۆڤ وخەڵکیشت بە مرۆڤ ئەزانی، بۆیە هەرگیز جلەوی ئارامی خۆت لە دەست نەئەدا، رێگاشت نەئەدا ئەو چاوانەی بە سۆمایەکی بەزەییدارانە لێت ئەروانن، وا بڕوانن، بەڵکو هەولت ئەدا خۆت بە سەقەت نەزانی، لە بەردەم نیگا شڕو سەقەتەکەی کۆمەڵەکەمان، وەکو ساغێک هەلسوکەوت بکەی ، ئەگەرچی تۆ لە قاڵبێکی نەگۆڕدا بوویت ودەوروبەریشت لە قاڵبێکی گۆڕاو وباڵا دەرکردن، بەڵام بێ ئەوەی کەسێک درک بە خەون وخەیاڵە گەورە باڵاو شاراوەکانت بکات....
گەلێک جار (دارا)ی زاوات هەر بە گالتەوە ئەیگوت ؛
" دلۆ ئیشی نیە، هەر ئەبێ (جیل) لەدوو (جیل) بەرێ بکات......"
خۆ راستیشی ئەکرد، نەوەکان چەند نادڵسۆزو بێ ئەمەک بوون، هاودەمت بوون تا ئەو دەمەی بالانسی باڵایان لە هاوسەنگی دا بوو، ئەو چرکەساتەی لەشولاریان جەند مللیمێک هەڵدەجوو، یەکاویەک پایدۆزیان دەکردو ئۆگریان دەکرد، چەند کەسێک دەناسم، هەر هەموویان لە رۆژگارێک هاوەل وبرادەری یاری وگەمەی منداڵی ئەو بوون، کەچی ئەوان کە باڵایان گەورەترو بەرزتر ئەبوو شەرمیان دەکرد، چیتر لەگەلت بمێننەوەو بەجێ یان دەهێشتی، تۆش بەوە راهات بوویت وخۆت تێک نەئەدا چاوەرێی منداڵێکی دیکەت لە زەمەنێکی دیکە دەکرد بێتە ریزبەندی و ولەگەلیدا دەست بە ژیانی پەیوەندیەکی تازەو جەولەیەکی دیکەی برادەرێتی بکەیەوە....
شەری چارەنووسی تۆ لەگەل قەدەر، شەڕێکی بەردەوامی ژیانت بوو دوایی نەئەهات، لەبەرئەوەی ئیرادەت هەبوو ئەوها زوو سارد نەئەبوویەوەو سلت نەئەکردەوەو بە جورئەتەوە خۆت لە قەرەی مڵملانێی سەرنج وقسە رەقەکانی بەژن ئاساییەکان ئەدا، هەمیشە لەبەردەم ئەو پرجک وتەگەرەو دارەبەستە ناسروشتانەی دەهاتنە سەر رێگای هەنگاوەکانت، ورەت بەر نەئەداو ژیانت لە خۆت تێک نەدەدا، تەنانەت مەکتەب وخوێندنیشت تەواو کرد، هەرچەندە ئاسان نەبوو دانیشتن لە یەک پۆڵ ولە سەر یەک تەختە کە هەموویان ئاسایی لە جەستەو باڵا بوون ، تەنیا ئەتوو شتێکی دیکە بوویت....
( بازۆ)ش هەمیشە وازی لەگاڵتە بێ سەرو بەرەکانی نەدەهێناو ئەیگوت ؛
" ئەزانی دلۆ..لە پێش چاومە ئەو رۆژەی ئەتوو مەکتەب تەواو ئەکەی.... ئەبیتە (موظف) ...لۆ ئەوەی (مراجعە)ەکان لە توو قیافایان بلندتر نەبن ...قۆرتێک لە پێش مێزەکەی خۆت لێ ئەدەی.... لۆ ئەوەی کەسەک خۆی بە گەورەتر لە توو نەزانی "
ئەتوو نە بە گالتەی ئەوان ونە بە راستی ئەو کەسانەی دەوروبەرت تەنگەتاوو مشەوەش نەئەبووی، ورەت بەر نەئەداو ئیرادەت توندتر ئەبوو، تاکە کەسێک ئەوەی لە مەینەتیەکانی تۆ تێدەگەیشت ولە بەردەم ئەو گالتانە بێ دەنگ نەدەبوو ولێیان دەهاتە دەنگ، دایکت بوو وەکو شێرەژنێک لێیان دەهاتە دەنگ وهاواری ئەکرد بە سەریان :
" بە قوربانی بن .....رۆژەک دێ ئەتان بینم لە هەمووتان پیاو تر ئەبیت....ئەبێ یەک یەک پێڵاوی لۆ دانێن....ئەو رۆژە دێ پیشانتان ئەدەم "
ئەویش لەوەدا راستی ئەکرد، چونکە ئەو رۆژە هات کە دایکی بیری لێ ئەکردەوە زۆر لەوانەی ئەو بەزمەیان پێ دەکرد، وەکو ئەو ئێستا ژیانێکی خۆش ناژین، ئەگەرچی ئەو لە باڵاو ژیانی رابردووی بە تێرو پری نەژیا، بەلام ئەمرۆکە بە تێری ژیانێکی ئاسایی ئەژیت وهەموو ئەو دەرفەت هەلانەی لە دەستی چوون، هەول دەدا دابینیان بکات، ئەوانەی گاڵتەیان پێ دەکرد، خاوەنی ئەو خانووبەرە نین ولە ناو ئەو ( سیارە)شدا هاتووچۆ ناکەن، بە قات وبۆینباخێکی شیک، لە پلەو پایەکی کاربەدەستی بەرز، ژنێکی خنجیلانی وەکو خۆی وسێ منداڵی جوان، دووانی ئاسایی ویەکیان نائاسایی لە باڵا. ئەوانە هەمووی دەستکەوتێکی بەرزی تۆن، لە سای خۆڕاگرتن وبەرزی هەست ونەستەکانت هاتنە دەست، نەک لە بەرزی باڵاوە......
خاڵەکەم !!!! بووە کەسێکی ئاسایی ناو کۆمەڵ، هەموو شتە لەدەست چووەکانی رابردووی خۆی دابین کردو پیادە کردن، ئێستا کەسێکی کاربەدەست و واقیعی ناو کۆمەلگایەیەو بەرپرسی دەزگایەکی باڵا نائاساییەکانە، بەڵام خاڵەکەم، بە داخەوە !!!! جارێکی دیکە ناتوانێت خەون وەکو جاران ببینێت وهەموو خەونە ناسک هەست و نەست وشتە پاک وجوانەکانی وەران وبوونە قوربانی خەزانی عومری بێ باڵایی، لە بڕی ئەو هەموو ئەو شتە جوان وسادانە بەرپرسێکی ئاسایی باڵا نائاسایی یە وەکو هەموو ئەو بەرپرسە نائاساییانەی بە نائاسایی لە هەڵتۆقین، ئەویش هەڵتۆقی وهەموو شتێکی لەدەست چووی بەدەست هێنا، بەڵام هاوەلێتی منی لەدەست چوو ومنیش خاڵێکم لە دەست چوو....
کوردستان-شەقڵاوە
پاییزی ٢٠١٠
Copyright (2008) Roshenbiry.com
