تشتێ زاروكينيا من ژ خهلكێن دى جودا دكهت، ئهو نهخوشى نه
ئهوێن دگهل مندا مهزن دبن و هێژ ئهز يێ باجا هندهكان ژوان
ددهم. دگهل مهزنبونا من ژى وهك ههڤكيفهكێ نه ڤهقهتيايى
دلهكێ نازك ژى دقهفهسا سينگێ من دا بهرپێن خوه فرهه دكهت و
نازكيا وى ژى ڤهدگهريت بو تهحلاتيێن بچويكاتيێ و ههر ئهو
كێماتى بوينه، كو ئهز كێش كريمه بههرهمهنديێ.
ئهز ل ههوه ناڤهشێرم، بهرى ئهز فێرى زمانێ نڤيسينێ ببم و
بخو بكهمه كار، من ههولێن گهلهك كارێن دى يا داى و ئهز
ناڤهشێرم ژى ههر كارێن من دهست هاڤێتيێ من يا حهژێكرى. بگره ژ
دكانداريێ و فروتنا كهل و پهلێن ناڤ ماليێ، بازرگانى، جوتيارى و
كارێ سياسى، ديندارى و ههيامهكى مهلاتى و سنعهتكارى و ههر
كارێ من خوه دهاڤێتێ ژى مهرج نهبو تێدا يێ سهركهفتيبام، ژبهر
كو من ژيان بو خوه دانا بو ئهزمونهك و يا گرنگ دێ چاوان ژيانا
من دگهل حهز و ئارهزوا من برێڤهچيت و ب دهستڤهئينانا پارهى
من بو خوه دانا بو دوماهى قوناغ، ئهگهرێ ڤێ چهندێ ژى من
دبيروكهيهكێ دا كار بهزرێن خوهدكر، ئهو ژى (حهز ل كارێ خوه
بكه، دێ پاره بدويف ته كهڤيت)، ژ هينگێ وهره ههر تشتهكێ من
حهژێدكر، ئهز ژ ههمى دلێ خوه حهژێدكهم و ههمى هێزا خوه
ددهمه سهر و دلسوزيا خوه بو دئێخمه كارى، چاوان من بو كارێن
خوه بيروكهيهك ههيه كو مهرج نينه دههمى تشتان دا مروڤ
سهركهفتنێ ب دهستڤهبينيت، ههر وهسان دحهژێكرنێ ژيدا مهرج
نينه ههمى ههڤال دگهل ته بهردهواميێ بكهن و حهژێكرنا وان
ههر وهكو ته بڤێت، دومێ بكێشيت.
دبيت ههر ئهڤ بيروكهيه ژى بيت، كو خو نهگونجاندن و نه
شارهزاييا من دلێكدانا پهيڤان دا، ئهز توشى گهلهك شكهستنان
كريم، ژبهركو ئهو خوديكا وێنێ من بهروڤاژى دكر، ئهز ملكهچيێ
رويهكێ راستگويێ دكرم، دسهر ڤێ ژي را، ئهز يێ رژد بومه دكارێن
خوهدا، ههر زوى من خوه لسهر پێن خوه گرتيه ڤه. ژێگرتنا من
بو كارێ نڤيسينێ، دبيت دوماهيك پێگهه بيت كو ئهز تێدا دخوه
بگههم و ئهز بشێم خاندنهكێ بدهمه ههر تشتهكى و يێ
سهرسورمان ژى نهبه گهر بێژمه ته ههر گاڤا ته ڤيا فالهكێ
بو خوه ڤهكهى، ههره دهف نڤيسهرهكى و پهحنكا دهستێ خوه
بكه دناڤ دهستێ ويدا و بهلێ ژبير ژى نهكهى، چ گاڤا ته ڤيا
پارهكى قهرز بكهى، خوه ژ نڤيسهرى دوير بێخه، ژبهركو ئهز
نزانيت پاران كوم ڤهبكهت؟!
ژ هينگێ ههكو من ئهڤ بابهته ژ روژنامهكێ قهوراندي، من دگهل
تشتێن خوه يێن بهادار ههلگرتى يه و من ڤيايه بزانم كا نڤيسهر
چ دخون و چ لبهرخوه دكهن و چهند خوشيێن ژيانێ بو خوه دكهنه
مال! بهلێ ببورن و لێبورينێ ژ وه، ئهڤێن هوين خوه بنڤيسهر
دزانن دكهم، كو ئهڤه ئهز يێ بناڤ سال ڤه دچم و بتنێ ژڤى جورێ
مروڤان، قهرهچان ئهز دبينم (دبێ پاره، فال ڤهكهر و خازوك)،
بتنێ ئهو پارا بو زكێ خوه دخازن و هوين بو چاپكرنا
پهرتوكهكێ.
