ههر ئێكى دزاروكينيا خوه دا هندهك سهير و سهمهره دگهل
خوه كرينه بيرهاتن، زاروكينيا من ژى تشتێن سهير تێدا
ههنه، چهند ئهز مێريهكێ دبينم ئهز دبێژم ئهو لكيرێ
دنڤن؟ زاروكينيا من و بيرهاتنێن من كهتنه ململانێ و جارنا من
دگوت پا ههكه ئهڤه جهێ عهرهبا بيت، ئاين بزمانێ وان بيت،
خاندن و زمانێ فهرمى يێ دهزگهها و تا ئهو تهلقينا لسهر
مريا ژى دهێته خاندن ب عهرهبى بيت و ههر فلم كارتونێ من
تهماشه دكرێ، وهك (سندبادى، دايسكى، رهجول لحهديدى و
ساسوكى) ژى بعهرهبى بن، پا ئهم كورد ژڤێ ههڤكێشهيێ ل
كيڤهينه؟
هندى بێژى من كون مێرى يێن هلكولاين و لدويڤ جهێ نڤستنا وان
چويم، ئهز نوكه دشێم ئێك دهمژمێر بێى وهستيان تهماشهى
رێزكهكا مێريا بكهم و لدويڤ بچم تا بهرێڤهى كونا خوه دبن.
ههكو سالان ئهز مهزن كريم و بويمه خودان ههڤژين، من بو
دهمێن درێژ تهماشهى باژێرى دكر، ئهرێ پا ئهز لكيرێ بنڤم و
ئێكهم كارێ ئهز پێڤه مژويل ئهز لێدگهريام لكيرێ بنڤم، تا
من بخو نهانيهك پهيداكرى و من سهرێ خوه و خێزانا خوه
كێشايه بن.
نوكه ئهز بيروكهيهكێ دناخێ خوهدا پهيرهو دكهم، دا كو
مروڤ يێ ئارام بيت، دڤێت جههك ههبيت سهرێ خوه لێ بدانيت!
بو نڤيسينێ پهرهكێ سپى و بو كارى پارچه عهردهك و بو
ئاڤاهى خانيهك و يا ژ ههميێ گرنگتر دڤێت ههر كهسى
وهلاتهك ههبيت و ئهو وهلات دتژى دام و دهزگههێن ميرى
بن، تو بێژى مێرى ژبلى نڤستنێ موچێ خو يێ ههيڤانه ژ كيرێ
وهربگرن.
ئهو ههڤكێشهيا ئهز نهشيايم بگههينمه ئهنجامهكى، بتنێ
ئێك پسيار ههر گاڤ بو من لپاش دما، ئهو ژى ئهو كى يه بێ
بهرامبهر ڤان ههمى پێدڤيان پێشكێش دكهت و ببێژيت بخێرا من
و بو ههوه و بههر وه بخو ههرنێ، بێى بچويكترين داخوازى ژى
بكهت، كو ئهم بدهستێن وان ڤه ماچى نهكهين؟!! تو بێژى
رێڤهبهر و بهرپرسێن مهژى ههتا كورسى بدهست خوه
ڤهئيناين پشتا دهستێن چهندان ماچى كرينه، و ههر كورسيا
نوكه ئهم ب واسته دگههينه بهر پێپكێن وێ ئهم باجا وان
ماچان ددهين.
