زاروكينى بيرهاتنێن گهلهك خوشن! گهر بو مروڤى دهست بدهت، لوێ
زاروكينيێ بزڤريت و جاروبارن سهرهدانا شوينواران بكهت. هێژ ئهڤ
زاروكينى يه سيناريويهكا زيندى يه ل پێش چاڤێن من، ههكو ئهم
چار پێنج زاروك دبوينه شڤانێن دوو سێ گيسكا و مه فراڤين دكره
دچانتكێن خوه دا و ئهم بو فراڤينێ ژى دماينه ل بهيارى. تشتێ
گهلهك كهيفا من بڤان بيرهاتنان دئينيت، ئهز دشێم پێ باشتر
ژيانا خوه رێك بئێخم، ژيانهكا گهلهك ب ساناهى! بتنێ دێ گيسكێن
خوه بهمه كيرێ چهرێ و دێ ل كيرێ ئاڤدهم و دێ ل كيرێ مهخهل
ئينم و لبن كيژ دارێ فراڤينێ خوم! ئهڤه روتينيهكا ههر روژ بو،
تشتێ ژڤێ روتينيێ من مفا ژێ ديتى دگهل روژانێن خوه يێن لبهر
گيسكان من بهرنامهكێ ژ روژێن دى جودا بو خوه ددانا، جارنا من
رێكا خوه ل وهرزێ گوندورێن مامێ هادى دئێخست و جارنا ژى من
مهتهرێ خوه يێ ئاڤێ ل كانيكا لناڤ جنيكا سهعيدێ زهليخايێ
دتهزاند و تژى دكر. براستى خودێ ژێرازى هندهك حليكێن پايزى يێن
سپى و مهزنێن لاو ههبون و بزورى دؤان ژێ جێه خوه دبنێ بهريكا
منا شهلوالى دادكرن.
ژيان يا رێكخستى بيت مروڤ ههست ب وهستيانێ ژى ناكهت، ئهڤێ
گوتنێ ئهز ههرجار ڤهدگێرم. نوكه ئهز يێ فێريويم و پهيرهو
دكهم، ژيانا خوه يا روژانه كو ئهز پێ خوه و خێزانا خوه رێك
دئێخم، روژێ گوهدانا چهند ستران و موزيكهكا و نيڤ سهعهتێ
پياسه و جارنا فلمهكێ بدلێ خوه و تا دوماهيێ دروينمه لبهر،
باشترين ههڤالێ خوه ژى من يێ كريه قهلهمێ خوه و ئهز
باوهرناكهم روژهكێ ژى بێى وى بزانم دهركهڤم، پهرتوكێن من
نێزيكترين فرا منن، كو ئهز دناڤدا بێهنێن كوير ههلكێشم. ههمى
روژنامه ههڤالێن منن و سهرقهلهمكێن من دناڤ دا جێه خوه
دبينن. پشتى ئهنترنێت ژى بو يه ههڤالهكێ دى، ژيانا من پتر يا
هاتيه رێكخستن!. كهس نه بێژته من بڤێ ژيانێ تو زهنگين نابى،
ژبهركو ئهم يێن فێربوين دهستێن ههر ئێك ژ مه يێت ددووسێ جهان
را و ئهم نهشێين د چ بياڤان دا بههرهمهندين ژبهركو ئهم وهك
مێريا بار ژ خوه مهزتر يێن لێهاتين، تو دزانى بو؟ ژبهركو جارنا
ئهم دناخێ خوه دا دبهرزهينه و ئهم نزانين د چ بياڤ دا
پێشكهفتنێ بدهستڤه بينين، ژبهر هندێ ژى ههمى تشتێن مه و تا
لهعبيكێن زاروكێن مه ژى ژ وهلاتێن دهرڤه دهێن. تو بێژى
چارهسهرى چبيت؟ ئهز دێ وێ ژى بێژم، ههر ئێك ژ مه ل ژيانا خوه
يا ساده بزڤريت و سيناريويا زاروكينيێ و ژيانا خوه سهروشنوى
رێكبێخيت. بكورتى ههر ئێك ژ مه تهرازيهكا ئهلهكترونى ب
دانيته دژورا خوه ڤه و روژانه سهنگا خوه پێ بكێشيت و ژ
ئاستێ خوه زێدهتر بو خوه نهدانيت، يا گرنگ ژى ههر ئێك رێزێ ل
جێه خوه بگريت، تا ئهم كێشا خوه نهزانين ئهم دێ جڤاكهك
مشهخور بين.
