ههر مزگهفتا روژا ئهینی تو قهست بكهیێ، دێ بێژی بهرێ
كهعبێ یێ كهتیه ڤێرێ و لبهر دهرێ مزگهفتێ و جاده و
كولانان ژی نڤێژكهران ملێن كارتون و جل نڤێژكان یێن
داینه ئێك. .. ههر نهخوشخانا تو بچیێ ژی پلێتا نوژداری
ب سرهیه و رێزكا سرهیا زهلامان دوو جار هندی یا ژنانه
و دڤێت ب سهعهتا بێهنێن درێژ ب ههلكێشی و كلینیكێن ژ
دهرڤه ژی گهر واستهیی تێدا نهبیت، تو نیڤا شهڤێ ژی
قهست ناكهیه ناڤ زاروكێن خو... ههرگاڤا دهرونێ ته
تێكچوو و ته ڤیا بایهكێ تهزى و پاقژ ههلكێشی!
نێزیكترین جهـ گهلیێ دهوكێ یه و دێ جورێن ترومبێلا بینی،
ملێن وان یێن گههاندینه ئێك، دێ بێژی پانوراما
سهنتهره تابقێ دوێ و سیێ یه و گهراجێ راوهستاندنا
ترومبێلا و ههكو (عادل ئیمام) دبێژیت "دێ هزركهی گهنجێن
دهوكێ ههمی مونكهری ڤه دخون"... ههر نیڤرویهكا دبهر
ناڤنجیهكا كچان را بچی ههكو دهرێ قوتابخانێ دهێته
ڤهكرن، ماشائهللا دێ بێژی كی دێ ڤان كچان ههمیان دهته
شوی... ههر بنگههێ پولیسان بچیێ و ئهحوالێن تهناهى و
ئارامیا باژێرى ژێ بپرسی، دێ بێژی كهس بو خێزانا خو چ
كهسب و كاران ناكهت و ههمیێن بوینه تهشقهلچى...
پرسگهه بخوه چنه، یێن بوینه ناسنامه بو رێڤهبهر و
بهرپرسان ههر كهسێ پتر مراجع لبهر دهرێ ژورا وى بن،
دێ ناڤێ دائیرا وى پتر گهریێت و بناڤ و دهنگ تر
كهڤیت... یا ژ خرهكێ ژی بو من نهخوشتر ههكو نیڤرو
دهێمه مال بو فراڤینێ دوو نانێن فرنێ دكرم و ههتا سرا
دگههیته من، دێ بێژی كولبهیا ل خهلكێ دهوكێ رابوی و
قور قورا زكێ ههمیانه ژ برسا دا.
