12/08/09 گوندی خۆڵه‌مێش: كارزان رِه‌حمان

گوندی خۆڵه‌مێش

كارزان رِه‌حمان

1

كه‌ مرۆڤ ده‌خنكێ:

ئه‌ی ئاو

چه‌ند دڵرِه‌قی!

2

من هیچ كاتێكم ناوێ،

ته‌نها ئه‌م سه‌ره‌ چزووانه‌م لێكه‌نه‌وه‌.

سه‌ره‌مێكوته‌ ده‌بێژێ:

سوره‌تی یاسینم بۆ بخوێنن.

3

له‌و كاته‌وه‌

مه‌مك خرِه‌، 

كه‌ حه‌وا

سێوی دزیوه‌!

4

له‌ نێوان قامیشه‌كاندا

سه‌ده‌یه‌ك ترووكا، دیتم رِووت بوو

پاش ئه‌مه‌

پێویستمان به‌ چوارچێوه‌یه‌ك ده‌بێ!

5

باڵنده‌كان به‌ خۆرِایی له‌ ئاسمان ده‌فرِن

هه‌روا مه‌به‌سته‌كانمان...

چاڵێك ماوه‌ته‌وه‌

نه‌فه‌رێك نییه‌!

6

كه‌ وێنه‌كه‌تم بینی

سێبه‌رم تا ئه‌وبه‌ری شار چوو!

7

مه‌رِه‌كان به‌ چه‌ند ده‌نكێك به‌فر ده‌چن.

گوندێك ده‌ڵێ:

مه‌رِه‌كان له‌ سه‌وزایی،

له‌ نێو ده‌نكه‌كانی به‌فر،

ده‌خنكێن!

8

سبه‌ینان، خۆر وه‌ك هه‌نار

خۆی به‌ ئاسماندا هه‌ڵده‌واسێت

كه‌ شه‌و هات

به‌رده‌بێته‌وه‌!

9

ژن هێللانه‌یه‌

به‌سه‌ر لكی دارێكی له‌رزۆكه‌وه‌

نیشتووه‌.

پیاوێك ده‌یه‌وێ جێنشینی هێلكه‌ بێ؛

ئیدی ئه‌ویش فێر ده‌بێ

چۆن بترووكێ و

چۆن جریوه‌ی بێ،

چۆنیش بفرِێ!

هه‌ولێر/ سه‌ره‌تای 2008، تا مانگی 6ی 2009