ده‌ لێگه‌ڕێن..

دارا ئه‌حمه‌د

ده‌سته‌کم پڕ پڕه‌
له‌ هوورتکه‌ ئه‌ستێره‌ و
ده‌سته‌کانیتریشم - هه‌ر هه‌موویان -
له‌نێو ئه‌گریجه‌ی
شه‌نگه‌بییه‌ ناسک و ته‌ڕوبڕه‌کانی
 ئه‌وبه‌ری ده‌روونم و
له‌ بن لقوپۆپی
 شاتووه‌ چڕ و مێخۆشه‌که‌ی
 ئه‌وبه‌ره‌ی ده‌روونم.. حه‌شار دایه‌،
ده‌ لێگه‌ڕێن .. درفه‌ت بده‌ن
ده‌ره‌فه‌تم ده‌ن
با هوورتکه‌ ئه‌ستێره‌کان - یه‌ک‌ به‌ یه‌ک - ئازاد بکه‌م
ئه‌وجا ئه‌و تاقه‌ ده‌سته‌شم؛
وه‌ک باخه‌وانه‌ک - پڕ ئه‌زموون -
سه‌ر لۆ‌ ناز و لاروله‌نجه‌ی
سه‌رله‌به‌ری دار و ده‌وه‌نی ده‌روونم
دابنوێنی و
له‌ خزمه‌تیان رابوه‌ستی .. ئۆقره‌ نه‌گری،
ده‌ لێگه‌ڕێن .. درفه‌ت بده‌ن
ده‌ره‌فه‌تم ده‌ن
با هوورتکه‌ ئه‌ستێره‌کان - یه‌ک‌ به‌ یه‌ک - ئازاد بکه‌م
     ئه‌وجا ئه‌و تاقه‌ ده‌سته‌شم؛
زه‌رده‌ لیمۆ، سێوه‌ لاسۆر، نارنج، ترنج...

تێکڕای مێوه‌ پێگه‌ییه‌کان خڕ کاته‌وه‌ و
له‌نێو ساردخانه‌ی ده‌روونی گه‌رم و پڕ تاوی خۆمیان خا
تا هه‌ر به‌ تورتیی و تازه‌یی
 گیای نه‌مرییان ده‌رخوارد بدا و
 گیانی تاتاییان وه‌به‌ر خا،
ده‌لێگه‌ڕین .. ده‌رفه‌ت بده‌ن
ده‌ لێگه‌ڕێن .. ده‌ لێگه‌ڕێن .. ده‌رفه‌تم ده‌ن ...

١\٧\٢٠١٠ - له‌نده‌ن

Dara@emrro.com