منارە و مۆز .. گومبەت و سێو

عومەر سەیدە ـ نەرویج

سەبەتەیەک میوە بۆ حاکم جاسم و وەزارەتى ئەوقاف و دانەیەکیشى لێ بدەنە(دلۆڤان)
من نەمویست ئەمە ناونیشانى ئەم بابەتەم بێت، نووسیم:"منارە لە کێر دەچێت و گومبەت مەمک"، بەڵام سڕیمەوە، ترسام لەڕێى پۆلیسى ئەنتەرپۆلەوە داوام بکەنەوە بۆ دادگاو بۆ بەردەمى حاکم جاسم و سکاڵاکاریش سەرەتا نوێنەرى هەموو دینى ئیسلام(دلۆڤان)و دواتر وەزارەتى ئەوقاف بێت لەسەرم، چەند گەورەیش دیارە ناوەکەیان.
سەرەتا دەبێت ئەوە بڵێم ئەم نووسینە وەڵامێکە بۆ حوکمى ناحکمانەى حاکم جاسمى شارى دهۆک، کە هەڵبەت جەنابى حاکم دونیا لە بەینى دوو دێردا دەبینێتەوە کە بەهۆیەوە هەزاران مرۆڤى بێتاوان دەکرێن بەداراو هەزارانى دیکەیش دەخرێنە ناو ژورەکانى زیندانەوە، کە پێى دەوترێت(قانون)، بەڵام چ قانونێک قانونێکى چەشنى ستریجى ژنان مەتاتى چۆنیان بوێت واى بە کێش دەکەن، کێیان بوێت دەیکەن بە تاوانبار و کام تاوانباریشیان بوێت ئازادى دەکەن.
سەرەتا من لەناوەڕۆکى شیعرەکەى(هۆشەنگ شێخ محەمەد)ەوە شتێک دەهێنمە دەرەوە، هۆشەنگ لە شیعرەکەیدا کە ناوى(منارە)ى هێناوە ناڵێت منارەى مزگەوت، کە دەڵێت:"گۆمبەت" نەیوتوە گۆمبەتى مزگەوت، بەڵام دەبێت حاکم جاسم و وەزارەتى ئەوقاف ئەوە بزانن کە منارەو گۆمبەت تایبەت نیە تەنها بە ئاینى ئیسلام و مزگەوت، بەڵکو لەزۆر شوێنى دونیا منارە هەیەو گۆمبەت هەیەو هیچ پەیوەندییەکى دوورو نزیکى بە ئیسلامەوە نیە، تەنانەت زۆرێک منارەو گۆمبەت هەیە کە مێژووەکەى دەگەڕێتەوە بۆ بەر لە ئیسلام، نەک هەر منارەو گۆمبەت، تەنانەت کەعبەیش بەر لە کەعبەى ئیسلام بوونى هەیە، نزیکترین بەڵگەیش کەعبەى زەردەشتییە لە ئێران، ئیدى ئیسلامیش لەسایەى داگیرکارییەکانیدا لەژێر ناوى گەیاندنى پەیامى ئیسلام کە چوونەتە هەر خاک و وڵاتێک پاش خاپوورکردنى مێژوو و موقەدەساتیان کۆمەڵێک سیمبول و فیگەرى ئەو نەتەوەو وڵاتانەیان هێناوەو بۆ خۆیان سوودیان لێبینیوە، نەک هەر ئەوەندە بەڵکو چیرۆکى دابەزینى وەحى بۆ لاى پێغەمبەرى ئیسلام دەتوانن لەچیرۆکى ژیانى زەردەشتەوە بیبیننەوە، قسەى من لێرەدا لەسەر ناوەڕۆکى راستى و ناڕاستى بنەماکانى ئاینى ئیسلام نیە، هێندەى قسەکردنە لەسەر نەبوونى مەعریفە لەلاى جۆرە کەسانێک کە لە دادگاو وەزارەتى حکومەتێک کار دەکەن، شەو و رۆژ مێشکى سەرى خەڵک و دونیایان بردوە باس لە دیموکراسییەت دەکەن، دیموکراسییەت بۆ کوشتن و بڕین و زیندانى کردنى خەڵکى بێ دیفاع هەیە، دیموکراسییەت بۆ حوکمى تاکڕەوى بوونى هەیە، دیموکراسییەت بۆ بەستنى دەمى شاعیرێک و رۆژنامەنووسێک هەیە، بەڵام ئەو دیموکراسییەتە تەسدیرکراوەى لەمەڕ حکومەتى هەرێمى کوردستان دیموکراسییەتێکى ئیفلیجەو  پێویستى بە هەموارکردن هەیە، شتێک کە خزمەتى بەنووسەران کردوە ئەوەیە: کە ئەو کەسانەى بەناوى حاکمەوە لەدادگان و بە پۆستى زل و قەبەوە لە وەزارەتەکاندان خەڵکانى نەخوێندەوارن، نەخوێندەوار بەو مانایەى کە ناخوێننەوەو ئاگایان لە قسەو باسى ناو کتێبى نووسەرەکانى کوردو دونیا نیە، ئەگەرنا هەموو رۆژێک حوکمى لەسێدارەدان و خزاندنە نێو زیندانى نووسەران و شاعیران دەرەکەن، بۆ نموونە کەسانێکى خۆشبەخت ئەمانەن(لەتیف هەڵمەت، قوبادى جەلیزاد، ئەحلام مەنسور) کە هەر یەک لەم نووسەرە بەڕێزو دیارانە بەشێوەیەک لە شێوەکان ئەو گەمەى نووسینەیان زۆر شاعیرانە کردوە، بەڵام هێشتا وەزارەتى ئەوقاف و حاکم جاسم پێى نەزانیون، ئەگەرنا دەبێت کۆتایى تەمەنیان لەزیندان بەسەر ببەن.
کاتێک باسى میوەکان دەکرێت و دەیشوبهێنن بە شوێنە وروژێنەرە سێکسییەکانى مرۆڤەکان، حاکم جاسم بۆ حوکمى نیە؟!! بۆ نموونە: مۆز و خەیار بە کیر دەچوێنن و من و حاکم جاسم و برادەرانى وەزارەتى ئەوقاف و خەڵکیش دەیخۆن و پێیان شەرم نیە، پرتەقاڵ و سێو و هەنار و لیمۆ و بەهێ بە مەمک دەچوێنن و زۆریشمان حەز لێیەو دەیخۆین، ئەى باشە ئەگەر دواکەوتوویى هزرى حاکم جاسم و وەزارەتى ئەوقاف نەبێت بۆ منارەو گومبەت دەبێت وا لێبکرێت کە لە دوو نووسەر بەڕێزترو بەرزتر تەماشا بکرێت، ئەگەر بێت دادگایەکى شەرعى بۆ حاکم جاسم و وەزارەتى ئەوقاف دابنرێت، حوکمى شەرع کۆمەڵێک گەمەى تیایە وەکو گەمەى قانونەکانى دەستى حاکم جاسمى دهۆک، بۆ نموونە:"انا خلقناکم فی احسن تقویم" ئەمە ئایەتى خودایە، یانى مرۆڤەکان بەباشترین شێوە دروستکراون، نەشیوتووە بێجگە لەمەمک و کێر، بەڵکو تەقویم یاخود شێوەى مرۆڤى بەباشترین شێوە وەسف کردوە قورئان، بەڵام هیچ ئایەتێکى قورئان نیە بڵێت"انا خلقنا المنارە و الگومبت فی احسن تقویم" کە وابوو جەنابى حاکم و وەزارەتى ئەوقاف بەهۆى شتێکى دەستکردنى مرۆڤەوە دوو تەقویمى باشى خودایان سزا داوە، بەم پێیەیش پێچەوانەى شەرعى خودایان کردوە.
بەڵام ئەگەر بێت و بڵێن هۆشەنگ مەبەستى لە منارەو گومبەتى مزگەوتە ئەوە حوکمێکى کوێرانەیە، چونکە کەس مافى ئەوەى نیە شت زیاد بکات بۆ سەر شیعرەکەى هۆشەنگ شێخ محەمەد و بڵێت مەبەستى ئەوە بووە، مەگەر بگەڕێینەوە بۆ چاخەکانى پێشوو کاتێک(لیژەى پشکنینى هۆش) لە کەنیسەکانى ئەوروپا مرۆڤیان دەخستە ژێر لێکۆڵینەوەوە بۆ ئەوەى شتێکى لەو جۆرەى پێ دەربخن و دواتریش دەیانسووتاند یان لەسێدارەیان دەدا.
ئەو سەردەمەیش بەسەرچووە، بەڵام بیرو هۆشى فەندەمێنتاڵیزمانەى حاکم جاسم و وەزارەتى ئەوقاف و ئەو کەسەى کە وەکو سکاڵاکار ناوى هێنراوە، دەیانەوێت حوکمى کوێرى بگەڕێننەوە ناومان، کە ساڵانێکە هەوڵدەدەین لەبەینى بەرین.
هەڵبەت گرفتەکە بەس ئەوە نیە کە حاکم جاسم و وەزارەتى ئەوقاف نەزان و نەخوێندەوارن، بەڵکو دوالیزمى بڕیارو گوفتارەکانى حکومەت و حیزبە کوردستانییەکان ئەو کەشەى خوڵقاندوە کە دەیان حاکم جاسم دروست ببێت.
ئەى ئەوانەى پەلامارى(سەباح عەلى قارەمان)یان دا کێ بوون؟! خۆ حاکم جاسم نەبوو، ئەى (ئیحسان مەلا فواد)کە کەلپچەیان لەدەست کرد حاکم جاسم نەبوو، بەڵکو حاکم و بەناو حاکم زۆرن کە فەرمانى نەخوێندەوارانە دەربکەن.
من لێرەوە وەکو نووسەرێک و شاعیرێک ئیدانەى ئەو مامەڵە ناشیرینەى دادگاو وەزارەت و لایەنە بەرپرسەکانى کوردستان دەکەم، دەرهەق بە نووسەرو رۆژنامەنووسان، داوایش دەکەم بتوانن مەودایەکى فراوانتر بدەن بە نووسەران، لەهەمان کاتیشدا بە نووسەران و رۆشنبیران دەڵێم:"ئەى قوڕتان بەسەر دەنگ هەڵبرن، ئەگەر وا بەردەوام بێت بارودۆخەکە ها کە دەزانن یەک یەک دەکرێن بەدارەوە، یاخود تۆپ تۆپێن بە کەللەسەرتان دەکەن بۆ ئەوەى کەس نەوێرێت شوێن پێتان هەڵبگرێت".
دواوتەیشم ئەوەیە: لە عێراق هەر منارەو گومبەتەو بەدەم بۆمبى چێنراوەوە دەچێتە ئاسماندا، بەدەگمەنیش تاوانبار دەستگیر دەکرێت، خۆ ئەگەر دلۆڤان و حاکم جاسم و ئەو خەڵکانەى وەزارەتى ئەوقافى حکومەتى هەرێم لە باشوورى عێراق بوونایە هەر رۆژى گەڕەکێکیان بۆمباران دەکرد لەسەر منارەو گومبەت.
بۆ بیرهێنانەوەى حاکم جاسم و وەزارەتى ئەوقافیش شتێک دەڵێم: با منارە سێگۆشە بووایەو گومبەتیش چوارگۆشە کەس پێى نەدەوت"منارە و کێر، گومبەت و مەمک"، بەڵام شێوەیان لەوانە دەچێت چى بکەین؟!!