04.05.2012

روناکییەک لە دەرگای نووسینم ئەدا. هەندرێن حەمەدەمین

یەکێک لەو هۆکارانەی کە منی بەرەو دونیای ئەدەب و نووسین برد، ئەو گێڕانەوانەی دایکم بوون، دایکم بە شێوەیەکی زۆر جوان و وورد و لەسەرخۆ باسی رۆژانی زووی خۆیی و خانەوادە و کەسوکار و دراوسێ و خزمەکانی ئەگێڕایەوە لە دوایی وام هەست ئەکرد کە من لەو سەردەم و لەگەڵ ئەو کەسانە ژیاوم، روداوەکانی وەک فیلم ئەخستە بەر چاومان، نازانم هەر من وا بە هەست و سەرنجەوە گوێم لە قسەکانی رائەگرت یان خوشک و براکانیشم وابوون، نازانم ئەو هەر منی کردبوو بە باخچەی چاندنی نەمامی روداوەکانی ژیانی یان بەبێ مەبەست و بیرکردنەوە هەر دەیویست خۆی بەتاڵکاتەوە لەو هەموو یاداشت و بەسەرهاتانەی لەناو دڵ و دەرون و ئەندێشەی هەڵیگرتبوون، رەنگە هەندێکجار وایزانیبێت ئێمە منداڵین هیچ لەو قسە و باسانە تێناگەین بۆیە بە هەلی زانیبێت بۆ ئەوەی کە هەرچیەک لەناویدا هەیە بۆ ئێمەی هەڵڕێژێ و بەشێک لە دەرونی خۆی پێ ئاسودە بکا، رەنگە هەندێکجاریش ویستبێتی لە رێگای گێڕانەوەی ئەو بەسەرهاتانە وانەکانی ژیان فێری ئێمە بکات، من ئەزانم کەم تا زۆر هەر هەموومان زۆر شت لە دایکم فێربووین، خوشک و براکانم درکیان پێ کردبێ یان نا من لەوە دڵنیام سەرچاوەی هەست و سۆزی ئێمە بە ئەو بەند و بالۆرانە گۆش ئەکرد کە بۆ منداڵانی ئەگووت، بەو گۆرانیانە بانگی منداڵانی ئەکرد و سەرنجیانی بۆ لای خۆی رائەکێشا، ئێستاش نازانم ووشەکانی ئەم گۆرانیانەی هی خۆی بوون یان ئەویش لە کەسانێکیتری بیستبوو! نازانم من بۆ جارێک ئەو پرسیارەم لێی نەکرد، چونکە وامئەزانی هی خۆیەتی وام هەست ئەکرد، هەستێک لە ئاستێکی بێگومانی کە پێویست بە پرسیار نەکات، دوای ئەویش لە کەسیترم نەبیست، مەگەر خۆم جار بە جار بۆ منداڵانم گووتبێتەوە و هەندێک جار گوێم لە خوشکەکانیشم بووە، ئەوەش هۆکارێکیترە بۆ ئەوەی بڵێم ئەو ووشانە هی دایکمن. (کوڕم جوانە بە تەنێ، کیژ و کاری ئەگەنێ، سەرو ماچی ئەدەنێ، ئەگەر منداڵەکەش کچ بوایە ئەوە ئەیگووت کیژم جوانە بە تەنێ ....هتد، بۆ کچانیش گۆرانی تایبەتی هەبوون، ئەیگووت، رۆژ هەڵات لە گەروان، دەیدا لە پەلکە توان، چاو رەشێ ئەبرۆ جوان، یان، رۆژ هەڵات و هاتە دەر، گەوارێکی کەوتە بەر، چاو رەشەی ئەبرۆ سەحەر)

>>>>>>>>>>>>

28.04.2012

ژنان لە من وەڕزن. ديمانه‌كار: فرناندا پيڤانۆ. وه‌رگێڕانی‌: شاڵاو حه‌بیبه‌

بوكۆفسكی: پاش ئه‌م بێنه‌ و به‌رده‌یه‌ بۆ ئاوها دیمانەیه‌ك، سه‌رله‌هه‌ووه‌ڵ ده‌بێ وڵامگۆی كێهان پرس ببم؟

پیڤانۆ: قایل كردنی تۆ بۆ گوتوبێژ زۆر دژوار بوو. داخوا تۆيش مینای زۆرێك له‌ نووسه‌ره‌كان، له‌ ده‌ست كۆوارگه‌ل و ڕۆژنامه‌گه‌ل و هه‌ر به‌لاڤۆكێكی دی وه‌ڕزی؟

بوكۆفسكی: زۆر نا. به‌ڵام ئا. من متمانه‌م به‌ به‌لاڤۆكه‌كان نییه‌. پێشتریش ئه‌مه‌م پێ گوتبووی.

پیڤانۆ: به‌ڵێ.

بوكۆفسكی: ئه‌وه‌ی كه‌ له‌ جانتاكه‌ت ده‌رت هێنا چییه‌؟

پیوانۆ: تۆماركاری ده‌نگ.

بوكۆفسكی: تێگه‌یشتم. ده‌ستگه‌یه‌ك، كه‌ ژیانی ئێوه‌ی ڕۆژنامه‌وانی پێوه‌ به‌نده‌.

پیڤانۆ: به‌ڵام ئێوه‌ی نووسه‌ران، شاعیران و هونه‌ركاران، ئێمه‌تان وا بار هێناوه‌.

بوكۆفسكی: ئێوه‌مان چۆن بار هێناوه‌؟

>>>>>>>>>>>>

28.04.2012

کچێک له‌ پایزدا .... سیروان خۆشناو . شه‌قلاوه‌

کچێک له‌ پایزدا هێمن هێمن به‌سه‌ر شه‌قامه‌کانی ته‌مه‌نا ئۆغر ئه‌کات

هێمن له‌گه‌ل سه‌ما عه‌شقیاکانی ژیان ئه‌گری و

له‌ باوه‌شی رۆمانێکی ماتا ئه‌بێته‌ به‌ کاراکته‌رێکی مه‌ستی

به‌ر ئاگردانی گوله‌ هه‌لوه‌ریووه‌کان و له‌گه‌ل بوونی پاکیزه‌یی به‌یانیه‌کان ئۆغر ئه‌کات

کچێک له‌ نیو ره‌نگه‌ مانا به‌خشه‌کانی پایز سه‌ما ده‌کات

نێوان جوانی هه‌ناسه‌ سارده‌کان به‌ لێوه‌ نورانیه‌که‌ی ماچ ده‌کات

ئه‌مه‌یه‌ فه‌نابوون له‌ نیو حه‌قیقه‌ته‌ گه‌رمه‌کان و

ون بوون له‌ نێو نێرڤانه‌ گوله‌ ریحانه‌ سه‌وزه‌کانی پایز و

به‌هه‌شته‌ سه‌رمه‌سته‌که‌ی بوون و نه‌بوونی ساته‌وه‌خته‌کانی مل که‌چ بوون

>>>>>>>>>>>>

28.04.2012

هه‌ناسه‌كانی بێزاریی ...كاروان محه‌مه‌د فه‌تاح

ئێواره‌یه‌كی پایزییه‌ و گه‌ڵاكان به‌ده‌م سه‌ماوه‌ هه‌ڵده‌وه‌رن و ده‌كه‌ونه‌ خوارێ‌، خۆر به‌ تیشكی زیوینی خۆی سه‌رزه‌وی گه‌رم كردووه‌، دڵشاد پاڵتۆیه‌كی درێژ و پانتۆلێكی ڕه‌شی له‌به‌ردایه‌ و بای ئه‌و عه‌سره‌ یاری به‌قژی ده‌كات و چه‌ند هه‌زارێكی چرچ و لۆچ له‌ گیرفانی چه‌پی پاڵتۆكه‌یدا خۆیان حه‌شارداوه‌، به‌ بێوازی چوون پشیله‌ی به‌رگه‌رمای بێتاقه‌ت ده‌رگای ماڵێكی گڵینی كۆن ده‌كاته‌وه‌ و دێته‌ ده‌رێ‌. ماڵێك له‌ لاپه‌ڕی شاره‌كه‌دا و له‌ كۆڵانێكی باریكی پاسفنده‌ و زماك و هه‌ژاردا...  دڵشاد به‌ناوه‌كه‌ی خۆی زۆر قه‌ڵس ده‌بێت، چونكی جگه‌ له‌درۆیه‌كی نووساو به‌خۆیه‌وه‌ هیچی دی نییه‌، تا ئێستا نه‌ ڕۆژێكی به‌ خۆشی گوزه‌راندووه‌، نه‌ توانیوویه‌تی ڕۆژێك هه‌ست به‌ دڵشادی بكات، واتا ناوه‌كه‌ی و ژیانی زۆر له‌یه‌كه‌وه‌ دوور بوون. له‌به‌ر ده‌رگا ڕاوه‌ده‌ستێت... چاوێكی تیژپه‌ڕ ده‌گێرێت به‌مسه‌ر و به‌وسه‌ری كۆڵانه‌كه‌دا... هیچ شتێك به‌دی ناكات، جگه‌ له‌ چه‌ند كچێكی بچووك نه‌بێت كه‌ خه‌ریكی یاری خه‌تخه‌تێنن، یه‌كێكیان وه‌كو قاز له‌كاتی خه‌وتندا، قاچێكی به‌ ئاسمانه‌وه‌یه‌ و به‌ قاچه‌كه‌ی تری و به‌ هه‌نگه‌شه‌لێ‌ خانه‌به‌خانه‌ شه‌ق له‌ به‌ردێكی چوارگۆشه‌ ده‌دات و ئه‌وانی دی ته‌ماشای ده‌كه‌ن، به‌رده‌كه‌ هه‌روه‌ك رۆژه‌كان زۆر خێرا خانه‌كان ده‌بڕێت.

>>>>>>>>>>>>

25.04.2012

وشه‌تێر: په‌رویز شاپوور . وه‌رگێڕانی: شاڵاو حه‌بیبه‌

یه‌ك: نێزيكترين مرۆكان له‌ يه‌كه‌وه‌؛ نه‌فه‌ره‌كانی پاسن.

دوو: چون ڕۆحم له‌ كاتی چوونیدا بۆ ئاسمان، سووته‌مه‌نی لێ بڕا، گه‌ڕايه‌وه‌ زه‌وی.

سێ: مێشكم كۆچی دوایی كرد و بيره‌كانم بێ سه‌رپه‌ره‌ست مانه‌وه‌.

چوار: ڕه‌شپێسته‌كان هه‌رگيز له‌ بواری ته‌عارووفدا، به‌ كه‌س ناڵێن: ڕووڕه‌ش خۆم.

پێنج: بۆ ئه‌وه‌ی كه‌س خۆی له‌ كارم هه‌ڵنه‌قوورتێنێ، له‌مێژه‌ وازم له‌ كار هێناوه‌.

شه‌ش: تا ته‌يار نيم به‌رپرسيارێتیی نووسراوه‌كانی سه‌ر به‌رده‌قه‌بره‌كه‌م له‌ ئه‌ستۆ بگرم.

حه‌وت: تێكڕای خه‌ڵكی جيهان به‌ يه‌ك زمان بێ ده‌نگ ده‌بن.

هه‌شت: شه‌ممه‌، ده‌ركه‌ی چوونه‌ژووری حه‌وته‌يه‌.

نۆ: مه‌رگ، حه‌قده‌ستی ته‌مه‌نێك ژيانه‌.

>>>>>>>>>>>>

14.04.2012

ده‌بێ پیس بخۆمه‌وه‌. یه‌كه‌مین گوتوبێژی چارلز بوكۆفسكی: وه‌رگێڕانی بۆ كوردی: شاڵاو حه‌بیبه‌

دۆزینه‌وه‌ی چارلز بوكۆفسكی دژواره‌ و كاتێ ده‌یدۆزیته‌وه‌ جا ژانه‌سه‌ر ده‌ست پێ ده‌كا. دیترێك گوتویه‌تی، كه‌سێك به‌ نێوی چارلز بوكۆفسكییه‌وه‌ بوونی نییه‌. ساڵان پڕوپاگه‌نده‌ی ئه‌وه‌ ده‌كرا، ئه‌و شیعره‌ وروژێنه‌رانه‌ی واژۆی ئه‌ویان پێوه‌یه‌، ڕاستانه‌ له‌ لایه‌ن ژنێكی به‌ ته‌مه‌نی ناقۆڵا و قژ درێژه‌وه‌ و به‌ دزییه‌وه‌ ده‌نووسرێن، به‌ڵام چارلز بوكۆفسكی لێره‌یه‌، له‌ ساختومانێكی تاكژووری، له‌ ناوه‌ڕاستی هالیڤوددا. كاتێ دەركه‌كه‌ی كرده‌وه‌: چاوگه‌لی خه‌مگین، ده‌نگێكی ماندوو و جلێكی درێژی ئاوریشمی، به‌ منیان گوت، ئه‌و به‌ری هه‌ر شتێكی دی مرۆیه‌كی ماندووه‌. دانیشتین، به‌ دیار په‌یڤ و خواردنه‌وه‌ی بیره‌ و ویسكییه‌وه‌ و چارلز سه‌رله‌ئاخیر وه‌ك پاكیزه‌یه‌ك خۆی به‌ ده‌سته‌وه‌ دا؛ یه‌كه‌مین گوتوبێژی خۆی به‌ گه‌ڕ خست. به‌رابه‌ر ساختومانه‌كه‌ی چارلز، ساختومانی ئالدۆس هاكسلی له‌سه‌ر گرده‌كه‌یه‌؛ شوێنێك كه‌ ژیانی تێ ده‌ڕژێ.

ئارنۆڵد. ل. كای

كای: وه‌ڕز نی له‌وه‌ی ساختومانی هاكسلی به‌رابه‌رته‌؟

بوكۆفسكی: پرسیارێكی چاكه‌. (خۆی هه‌ڵده‌داته‌ لای درزی جێخه‌وه‌كه‌یه‌وه‌ و دوو له‌ وێنه‌كانی ده‌ر ده‌هێنێ.)

كای: كێ ئه‌مانه‌ی گرتوون؟

بوكۆفسكی: كچه‌هاوڕێكه‌م؛ پارساڵ مرد. پرسیاره‌كه‌ چی بوو؟

كای: له‌وه‌ی كه‌ ساختومانی هاكسلی به‌رابه‌رته‌ وه‌ڕز نابی؟

>>>>>>>>>>>>

08.04.2012

ئۆرهان وه‌لی كانيك، ١٣ی ئاوريلی ١٩١٤، له‌ شاری ئيستانبووڵ له‌ دايك بووه‌. له‌وێ ده‌ستی به‌ خوێندن كرد و پاش فه‌تره‌يه‌ك، باوكی: محه‌ممه‌د وه‌لی كانيك، به‌ مه‌به‌ستی درێژه‌دان به‌ خوێندن، بۆ ئانكارای نارد. له‌ ئاماده‌يیدا، له‌گه‌ڵ ئوكتای ڕه‌فعه‌ت و مه‌ليح جه‌وده‌تدا- دوو له‌ شاعيره سه‌ر‌كێشه‌كانی توركيه‌- ئاشنا بوو، كه‌ هاوڕێيه‌تی لێ كه‌وته‌وه‌. بزوو‌تنه‌وه‌يه‌كی شيعریيان پێك هێنا، به‌ ناوی: غه‌ريب. سه‌ره‌تا ئه‌و سێ كه‌سه‌ به‌ جۆرێك شيعريان ده‌نووسی، كه‌ شيعری ئه‌م له‌ هی ئه‌و جودا نه‌ده‌كرايه‌وه‌، پاشان هه‌ر يه‌كه‌ و شێوازی خۆی دۆزييه‌وه‌. پاش گه‌ڕانه‌وه‌ بۆ ئيستانبووڵ، چووه‌ زانستگه‌ی ئه‌ده‌بيات- به‌شی فه‌لسه‌فه‌-وه‌، به‌ڵام له‌ ساڵی ١٩٣٥دا خوێندنی نيوه‌چڵ به‌ جێ هێشت. ساڵێك پاشتر، له‌ ئانكارا، له‌ به‌شی به‌ڕێوه‌به‌رێتیی پۆست و تێليگرافدا ده‌ستی به‌ كار كرد و ماوه‌يه‌كيش له‌ وه‌زاره‌تی په‌روه‌رده‌ و فێركردندا، چووه‌ به‌شی وه‌رگێڕانه‌وه‌. له‌ ساڵی ١٩٤٢دا به‌ هۆی ناديموكراتيبوونی ئه‌وێ- به‌ گوته‌ی خۆی- وازی له‌ پيشه‌كه‌ی هێنا.
هه‌ووه‌ڵين به‌رهه‌مه‌كانی خۆی، له‌ ساڵی ١٩٣٦دا و له‌ كۆواری وارليكدا بڵاو كردنه‌وه‌.
له‌ ساڵی ١٩٤١دا، ئۆرهان له‌گه‌ڵ ئوكتای ڕه‌فعه‌ت و مه‌ليح جه‌وده‌تدا كۆشيعری غه‌ريبيان بڵاو كرده‌وه‌، كه‌ كاريگه‌ریی فراوانی بۆ سه‌ر شيعری توركی هه‌بوو. به‌وجۆره‌ بزووتنه‌وه‌ی نوێخوازانه‌ی غه‌ريب سه‌ری هه‌ڵدا.

>>>>>>>>>>>>

08.04.2012

له‌چاوه‌ڕوانی ده‌ركه‌وتنی كیژۆڵه‌یه‌كدا . كاروان محه‌مه‌د فه‌تاح

 
ئه‌و ڕۆژه‌ شار زۆر جیاوازتر له‌ڕۆژه‌كانی دی خۆی نمایش ده‌كرد، هه‌وا فێنك و شار ئارام و ئاسمان ساماڵ بوو، خۆر ده‌دره‌وشایه‌وه‌ و ورشه‌ی په‌خش ده‌كرد. له‌وه‌ته‌ی له‌و شاره‌دا بووم هیچ ڕۆژێكم به‌ ئه‌ندازه‌ی ئه‌و ڕۆژه‌ جیاواز نه‌بینیبوو، ئه‌مه‌ دڵخۆش و شادومانی كردم، ئاخر بوونی جیاوازییه‌ واده‌كات ژیان جوانتر و ڕه‌نگاوڕه‌نگتر پێناسه‌ی خۆی بكات و له‌ززه‌تبه‌خشتر بێت بۆ مرۆڤ، به‌وه‌دا هه‌موو ڕۆژه‌كانی ساڵ هه‌وایه‌كی مه‌یله‌ و زه‌ردی خنكاوی خۆڵه‌مێشی شاری ده‌ته‌نی.پاش ته‌واوبونی ده‌وامی زانكۆم براده‌رێكم ئۆتۆمبیله‌كه‌ی له‌پێشم ڕاگرت و وتی((سه‌ركه‌وه‌، ده‌تبه‌مه‌وه‌ بۆ به‌شه‌ ناوخۆییه‌كه‌ت.)) منیش سوپاسگوزاریم لێكرد و چوومه‌ نێو ئۆتۆمبیله‌كه‌یه‌وه‌. له‌پڕ له‌به‌رده‌م مزگه‌وتێكدا داوای دابه‌زینم كرد، ئه‌و مزگه‌وته‌ی كه‌ چه‌ندینجار نوێژم تیایدا ئه‌نجام داوه‌، وه‌لێ‌ ئه‌وه‌نده‌ی كچێك منی كه‌مه‌ندگیر ده‌كرد بۆ ئه‌و مزگه‌وته‌، هێنده‌ ترس و خۆشه‌ویستی خودا ئه‌و هێزه‌یان به‌من نه‌ده‌به‌خشی. نازانم چی هێزێك له‌ناخه‌وه‌ پاڵی پێوه‌ ده‌نام و پێی ده‌گووتم <<لێره‌ دابه‌زه‌!>>. هاوڕێكه‌م نكۆلی لێم نه‌كرد و دایبه‌زاندم بێئه‌وه‌ی بپرسێت(( بۆ لێره‌ داده‌به‌زیت؟ خۆ ئێره‌ ئه‌و شوێنه‌ نییه‌ كه‌بڕیاره‌ بۆی بچیت؟))

>>>>>>>>>>>>

29.03.2012

خوێندنەوەی یەکەم رۆمانی کوردی (ماڵی رێحان) ی هۆشەنگ شێخمحەمەد. میدیا- ئەڵمانیا

ماڵی رێحان يەكەم رۆمانه كه من به زمانی کوردی بیخوێنمەوه. نەمدەزانی كەسانێكی وەك (هۆشەنگ شێخمحەمەد) هەن كە بتوانن زمانی کوردی لە رێگای نووسينەوە بە جيهان بناسێنن، بۆ كەسێكی وەك من كە هه‌ڵقوڵاوی كولتورێكی ترم بە خوێندنەوەی (ماڵی رێحان) شه‌یدای رێحان و شەيدای وشە یه‌ك لەدوای یه‌كه‌كانی (ماڵی رێحان) بووم، ئه‌مه‌ش وای كرد بگەمه ئەو جێگايەی كە دەمەوێت، يان لە راستيدا ئەوەی كە نووسەر دەيەوێت من بيگەمێ .

 (ماڵی رێحان) وشە به وشە كاری له دەروونم كرد، كارێكی وا كە دەبێت هەر رۆژه و دووبارە پارچەيەكی لێبخوێنمەوه، چونكە هەست دەكەم تێكەڵی هه‌ست و بیرم بووە.

لەگەڵ خوێندنەوەیدا، هەست دەكەم منيش لە (ماڵی رێحان) دەژيم و يەكێكم لە كارئەكتەرەكانی نێو رۆمانەكه . بۆ من گرنگی ئه‌م رۆمانه‌ له‌وه‌دایه‌ كاتێ ده‌یخوێنمه‌وه خۆمی تێدا دەدۆزمەوه و هەست دەكەم كە هەر یەک له كارئەكتەرەكان له گەڵم دەدوێن و باسی رووداوێكی راستەقينەی ژیانی مرۆڤایه‌تیم بۆ ده‌كه‌ن. دەكرێت بڵێین كە ئاوسبووني نێر نه‌ رووداوێكي راستەقينەیه‌ و نه‌ زانستیشه‌، بەلام وەك (هۆشەنگ شێخمحەمەد) دەڵێت دەكرێت هەر كەسێك بە شتێك ئاوس ببێت .

>>>>>>>>>>>>

29.03.2012

لە دەروازە جیاوازەکانی (ماڵی رێحان)ی (هۆشەنگ شێخمحەمەد) دا. هەندرێن حەمەدەمین

 بەشی یەکەم

ئەگەر ئاوسبوون لە منداڵدان یەکێک بێت لە جیاوازییەکانی نێوان ژن و پیاودا، بەهۆی جیاوازی کۆئەندامی زاوزێ، ئەوا ئاوسبوونی مێشک ئەو جیاوازییە تەواو کاڵ ئەکاتەوە، ئاوسبوون بە منداڵ یەکێکە لە غەریزە سەرەکییەکانی مرۆڤ، بەردەوامبوونی ژیانی پێوەیە، لەگەڵ ئەوەشدا بە بەردەوام ترس و دڵەڕاوکێی لەناو مرۆڤەکاندا دروست کردووە، کاتێک ژنێک ئاوس دەبێ وەک ئەوە وایە کە نهێنیەکی زۆر گەورەی لەناو خۆیدا هەڵگرتبێ، تا ئەو منداڵەی ئەبێت بە سەدان بیر و بۆچوونی جیاواز لەبارەی ئەو مرۆڤە نوێیە ئەگوترێت، ئەم گوتنانە سەرچاوەی ترس و دڵەڕاوکێن، سەرچاوی گوتنەکان ئەو سەرانەن کە مێشکەکانیان ئاوسن، ئاوسبوونی مێشکەکان وەک ئاوسبوونی منداڵدانەکان نهێنی بوونێکیان بەدواوەیە کە ترس و دڵەڕاوکێ ئەخاتە نێو مرۆڤەکان.

ترس لە بوونی منداڵێک و بوونی بیرێک ئەوەندە لە یەک ئەکەن من خۆم ناتوانم بە ئاسانی لە یەکتریان جیا بکەمەوە، کە ژنێک یەکەم نیشانەی دووگیانبوونی دەرئەکەوێت لەگەڵ هەستکردن بە خۆشی و لەزەتی مێیایەتی خۆی ئەوەندەش ترس دایئەگرێ لە نەزانینی چەشنی ئەو کۆرپەلەیەی لەناو خۆیدا هەڵیگرتووە، نازانێ تا وادەی بوونی چی رووئەدات، ئایا ئەتوانێ ئەو ماوەیە بە ئارامی و بێ کارەسات بێت، ئەوە گومانە لەوەی ئایا ئەو منداڵە ئەگاتە ئەو کاتەی کە بە سروشیتی بێتە ژیان، ئەگەر نەگەیشت چی ئەبێ؟ چۆن ئەبێ؟ بە مردویی ئەبێ؟ خۆشی لەگەڵی ئەمرێ؟ ئاخر زۆر لە ژنان بە هۆی منداڵە مردووەکانی ناو زگیان خۆشیان مردوون، رێک وەک ئەو کەسە وایە کە هەست بە بوونی بیرۆکەیەک ئەکات لە مێشکی، نازانێ ئەوەی لە مێشکیدایە چیە، ئایا تا ئەو کاتەی بیرۆکەکەی مێشکی پێئەگات و وادەی بوونی دێت ئەتوانێت بە ئارامی و دوور لە کارەساتەکان ژیان بکات و بیرۆکەکەی ناو سەری کە مێشکی پێی ئاوسە نەیکوژێت، خۆ زۆر کەس بە هۆی ئەو بیرۆکانە ژیانیان لەدەست داوە، چونکە چۆن ژن ئاوسبوون شەریعەت و داب ونەریت و یاسای هەیە هەروەها سەر ئاوسبوون شەریعەت و داب و نەریت و یاسای خۆی هەیە، ژنێک کە ئاوس ئەبێت، ئەبێت بزاندرێت چۆن ئاوس بووە، لە کێ ئاوس بووە، ئەوەی ئەیبێت هی کێیە، کە بوو لەگەڵ کێ و لە کوێ ئەژی، هەموو ئەو شتانە ئەبێت بە پێی شەریعەت و نەریت و یاسا بێت، خۆ بۆ بیرۆکەش هەر وایە کە کەسێک سەری ئاوس ئەبێت ئەبێ بزاندرێت بەچی ئاوسە، لە چی ئاوسە، ئەوەی ئەیبێت چیە، بۆچیە، هی کێیە، بۆ کێیە، هتد..........

>>>>>>>>>>>>

27.03.2012

چەند شیعرێکی بێکەس حەمە قادر

 من گۆرِه‌وانى سه‌رده‌مه‌كانم

له‌م بوولێڵ و تاریكستانى روحه‌دا 
منى گۆرانى بێژى سه‌رده‌مه‌كان 
وه‌ك به‌ردێكى لارِى قووڵ قووڵ كه‌وتمه‌ ناو تاریكى و 
وه‌ك كانییه‌كى داچۆرِاوى ته‌نیا له‌بیر كرام 
به‌ ته‌نیا هه‌ر بیره‌وه‌رییه‌كانم 
له‌م سارایه‌ى رۆحه‌دا گه‌رمى ده‌كردمه‌وه‌ 
ئاى بیره‌وه‌رى چه‌ند پیرۆزى 
ئا له‌م ته‌نیایى و روحه‌دا 
هالاَوى ده‌روونم 
له‌سه‌ر جه‌سته‌م وه‌ك هه‌ڵم به‌رز ده‌بێته‌وه‌ 
كلیلى زیندانیه‌كان شكان 
مرۆڤ وه‌ك ره‌وه‌ كۆترێك 
هاتنه‌وه‌ ناو زه‌مین 
باى ئازادى له‌ مرۆڤى دا 
ئاى مرۆڤ

>>>>>>>>>>>>

23.03.2012

رامانه‌کانی ئاگرپه‌رستێک: ئه‌حمه‌دی مه‌لا

ئاگرپه‌رستێکی مه‌دهۆشبووم

له‌ په‌رستگاکانی سه‌رده‌شت،

مێزه‌رکه‌م ته‌نها خوناو و

پژدێنه‌که‌م ئاڵابووه‌ جوانیی.

ئاگرپه‌رستێک بووم

له‌ هه‌یوانه‌کانی په‌نگر

دڵی خۆم به‌وه‌ ده‌دایه‌وه‌

باوباپیرانم توێشویان

گزنگ و‌

له‌ جیاتی بازوو

په‌ڕوباڵیان لێ ده‌ڕوا.

>>>>>>>>>>>>

بابەتەکانی مانگی 3 ی ٢٠١٢

29.03.2012

29.03.2012

27.03.2012

23.03.2012

19.03.2012

ماڵێک لە رێحان و دەقێک لە رۆمانسیەت... شوان عوسمان. هۆلەندە

17.03.2012

17.03.2012

12.03.2012

12.03.2012

06.03.2012

هه‌ندرێن حه‌مه‌ده‌مین: ئەو کاتە باوڕ بە بوونی خوێنەر دێنم کە ببینم دەقەکان چوارچێوەی په‌رتووک و دۆستەکانی نووسه‌ر ده‌شکێنن.

ئه‌رشیفی ماڵپه‌ڕ